鹰金钱：百年鲜香，成就标志风味

1893年，广茂香罐头厂生产第一罐豆豉鲮鱼罐头，更名为广奇香罐头厂后，喺19 12年于香港注册“鹰金钱”商标品牌。19 5 6年，国家筹建广 东 罐 头 厂 ，于19 5 8年落成投产，成为亚洲最大罐头厂。广东罐头厂见证广州城市发展同广州人饮食水平嘅变化，鹰金钱作为中国罐头行业嘅龙头，系代表广府饮食文化嘅民族品牌。今次记者采访到广州鹰金钱企业集团公司党委副书记黄穗平，听佢悉述百年鹰金钱嘅发展史。

第一罐豆豉鲮鱼诞生，开启百年历史

南都：虽然广东罐头厂系喺1956年创建嘅，但系鹰金钱作为一个品牌，伴随住第一个豆豉鲮鱼罐头诞生，据闻系喺1893年？

黄穗平：如果讲豆豉鲮鱼嘅诞生，就唔系话有广东罐头厂先有豆豉鲮鱼。广东罐头厂嘅前身，系广茂香罐头厂，呢间厂好早就已经有嘎喇，第一罐豆豉鲮鱼就诞生于1893年。当时有好多华人，漂洋过海去南洋打工谋生，于是佢就将啲鲮鱼煎咗，揾啲豆豉、油浸住佢，用个瓦鐣装住，带过去食。点解会系豆豉鲮鱼呢？主要系因为当时过去嘅人，大多数都系珠三角嘅，豆豉鲮鱼比较有家乡风情。过到去嗰边，食唔惯西方啲嘢，所以就食豆豉鲮鱼，豆豉本身系广东特产，以阳江出产为佳，鲮鱼本身系珠江三角洲特有鱼类，以南番顺最靓，呢两样嘢都系第二度冇嘎。后来，豆豉鲮鱼就逐渐演变成一种罐头食品。当时广茂香罐头厂，基于有咁嘅市场，佢哋就自己做咗第一个用铁罐嚟装食品嘅罐头。

南都：早期生产豆豉鲮鱼嘅厂家，系咪主要系人工操作嘎？

黄穗平：实质上，嗰阵时冇咩罐头厂，都系啲自己做嘅作坊仔，都系手工操作嘅。好似抽真空咁样，冇空气嘅话就细菌少，细菌少就保质。以前都仲系要靠加热嚟抽真空，装好罐头之后，加热排气，排完之后嗱嗱声焊住个口，咁样嚟抽真空。而家就唔使啦，直情就抽晒出嚟。以前佢系咁样操作嘅，后来就慢慢发展成简单手工操作嘅机械。

南都：鹰金钱呢个品牌，先于广东罐头厂就有，系点样嚟嘅呢？

黄穗平：实际上，鹰金钱呢个牌子，就系喺原来广奇香罐头厂自己做嘅时候，喺香港注册嘅。最初嘅时候，做第一个豆豉鲮鱼罐头嘅，系广茂香罐头厂，后来就改成广奇香罐头厂，之后又改咗叫广利和罐头厂，后来解放后建成广东罐头厂，一路咁样演变过嚟嘅。而家我哋讲“百年鹰金钱”，就系由当时注册呢个鹰唛金钱嘅时间计起。睇返资料，当时系1912年，广奇香罐头厂喺香港注册嘅商标。鹰金钱豆豉鲮鱼罐头，就系由呢啲厂不断咁延续落嚟。到1950年代，广东罐头厂时期，佢就唔单止做豆豉鲮鱼罐头喇。因为当时嘅主要任务系出口，所以广东罐头厂生产出口罐头，罐头嘅类别就多好多啦，有水产类、肉类、水果类、蔬菜类以及其他类别。

亚洲最大罐头厂，贯穿计划年代

南都：1956年，政府喺广州创建广东罐头厂，当时系出于乜嘢考虑？

黄穗平：嗰个时期，苏联老大哥帮助中国搞一共160个项目，广东罐头厂嘅项目系其中之一。1958年，广东罐头厂落成投产，系当时亚洲最大嘅罐头厂，由苏联专家帮我哋一齐起嘅，所以喺当时影响比较大。至于喺广东建呢个罐头厂，据我哋了解，主要系广州系东南沿海最大嘅城市，广东嘅水产、水果资源又都比较丰富，比较适合做罐头。

南都：苏联方面嘅支持，体现喺边啲地方呢？

黄穗平：由于苏联项目重点扶持过，我哋睇到原来厂区嘅建筑，好似职工宿舍咁，都系苏联建筑。而家员村三横路同四横路之间，呢一片宿舍区就系原先罐头厂、玻璃厂、化工厂、氮肥厂嘅宿舍，你可以睇到全部建筑都好似蒙古包咁样。严格嚟讲，呢种建筑北方就啱，保温；但系同南方系唔啱嘅，南方通常要对流，讲究阳台、天台。

南都：六七十年代嘅时候，国内嘅政治气氛比较复杂，对广东罐头厂有冇咩影响呢？

黄穗平：六七十年代，特别系“文革”嗰阵时，罐头厂由于主要做出口食品，相对其他厂冇咁大影响。其他厂要停工停产，罐头厂唔得，要出口，要军供，冇得唔做。而且嗰阵时冇冷库，原料呢头嚟到，即刻要当天处理，所以唔单止唔停产，仲要系广州各大专院校、国企，只要罐头厂有原材料到，佢哋都要放低手头上嘅嘢嚟支援。曾经最繁忙嘅时候，罐头厂成万几人喺度做嘢，嗰阵时叫做“原料大会战”。甚至乎嗰阵时嘅运输都动用到军队，罐头厂嘅设计，有三个码头，一条铁路。而家呢啲都已经变成经典，条铁路都仲系红专厂。

南都：同解放前小作坊式工厂相比，广东罐头厂嘅食品种类系咪多咗好多？

黄穗平：以前嘅厂属于个体厂，冇可能形成大规模生产，都系小打小闹，主要就系做鲮鱼。但系当时搞亚洲最大罐头厂，如果净系做鲮鱼，梗系唔掂啦，当时嘅出口任务，可以话系水产同肉类并重，加埋蔬果类。而家我哋讲嘅鹰金钱，喺广东罐头厂时期，系冇用呢个鹰唛金钱嘅商标。因为当时系计划经济年代，唔注重商标，只要你做出产品，交畀中国粮油进出口公司去出口。

南都：广州人呢个时期对罐头食品嘅利用情况如何？

黄穗平：计划经济年代，罐头属于奢侈品。以前有得食罐头好巴闭嘎喇，系人哋出国带去食，或者系用嚟送礼，普通人要请客先至开罐头加餸。我喺厂度做嘢，亲戚叫我帮手买罐头，都要打批条。1960年代，有一年罐头厂火烛，啲标志烧窿晒，或者救火嘅时候啲罐dup笠晒，出唔到口，唯有转内销，夹平卖。出于咁嘅特殊原因，嗰年广州好多人先食到罐头。总体嚟讲，罐头食品作为一种普遍流通嘅产品，实际上都系改革开放之后嘅事。

粤式好味道，树立广东民族品牌

南都：改革开放之后，广东罐头厂嘅生产同销售有咩变化呢？

黄穗平：1984年，我哋系第一批可以自营出口嘅食品企业。而且，改革开放之后，放开畀罐头厂自己做，可以用自己嘅品牌。所以，八十年代后期，我哋就揾返罐头厂嘅历史，知道前身原来系有个鹰唛金钱咁嘅商标同品牌，所以就攞返呢个品牌嚟做，后来正式用返“鹰金钱”嚟命名企业。不过，广东罐头厂，仍然作为我哋嘅第二名称保留。有啲人以为广东罐头厂冇咗，其实唔系。喺销量方面，因为唔单止做出口，国内市场需求大咗，整个产销量就比以前大好多，因为国民生活水平有所提高，罐头就从过去嘅奢侈品，变成一种日常食用品。

南都：一直到2008年，广东罐头厂都喺现时员村红专厂嘅厂址，后来搬出市区系咩原因呢？

黄穗平：当时市政府提出要“退二进三”，所有嘅工业都要退出市区，我哋系响应呢个政策要求，第一批撤出，搬咗上从化。呢次搬厂，并唔系原来厂房嘅简单复制，而系重新打造一间现代化新厂，对于老国企嚟讲，系一次脱胎换骨嘅机会。而家鹰金钱，基本上冇手工劳动，除咗装罐呢部分冇办法代替人手之外，其他基本上都系机械化生产。

南都：家有好多品牌都做豆豉鲮鱼罐头，但系一般广州人都认定豆豉鲮鱼就系要鹰金钱至好。鹰金钱系点样做到呢样嘢嘅呢？

黄穗平：第一，广东罐头厂本身已经深入民心，消费者对呢个百年老字号嘅品牌有信心。以前有个市领导讲：有华人嘅地方，就有鹰金钱。第二，产品质量。鹰金钱豆豉鲮鱼曾经攞过两次国家金质奖，配方系当时国家级保密项目，当然解密之后，大家都可以生产。但系，我哋系一直严格按照攞金质奖嘅配方，唔偷工减料。市面上嘅鹰金钱豆豉鲮鱼卖得比人哋贵，但系一样卖得起。无他嘎，人哋对你嘅质量有信心。

南都：2006年嘅时候，鹰金钱申请中华老字号，当时系出于乜嘢考虑？

黄穗平：其实主要都系出于对呢个品牌嘅爱护。既然鹰金钱罐头鲮鱼喺消费者心目中、喺广府饮食文化当中都有一定嘅位置，我哋希望用鲮鱼罐头嘅历史，保护同提升广州嘅饮食文化。所以，鹰金钱作为老字号嘅价值，主要都系一种市场效应同埋广州饮食文化嘅体现。对老字号嘅认识，关键唔系睇个“老”字，而系睇“字号”，一个系产品嘅文化，二个系产品嘅质量。豆豉鲮鱼对广州人嚟讲，真系一种美味嘅享受。

记者手记:一罐豆豉鲮鱼，见证时代变迁

一讲起鹰金钱，红黄相间椭圆形嘅豆豉鲮鱼罐头会直接“叮”一声喺头脑度弹出嚟，呢种印象，可以话系根深蒂固嘅。豆豉味特别香浓，同河鲜之王鲮鱼搭配，将鲮鱼嘅鲜甜，调和得特别惹味。呢种美味，绝对系粤人一大发明，亦系粤人先至识得欣赏嘅广式风味。

听黄书记讲，第一个豆豉鲮鱼罐头嘅诞生，同当时广东人远渡重洋去海外谋生有关。广东向来系输出华工最多嘅地区，一罐豆豉鲮鱼，可以折射咗华人外出掘金嘅辛酸史。

后来，广东罐头厂落成投产，成为亚洲最大罐头厂，系经济困难嘅特殊时期都冇任何影响咁隆隆向前嘅“生产大火车”，反映当时嘅广州生活情景。有次带父母行红专厂，令佢哋兴奋嘅，并唔系随处可见创意小店同艺术展览，而系作为广东罐头厂旧址嘅一座座旧厂房、一个个旧锅炉。佢哋曾经嚟罐头厂支援过生产，参加过“荔枝大会战”，罐头厂嘅旧屋，勾起佢哋六七十年代嘅记忆。

黄书记话，鹰金钱嘅罐头鲮鱼，从奢侈品变成日常食用品，见证咗广州人饮食水平嘅提高。如今，豆豉鲮鱼已经闻名海内外，一种广东风味嘅嘢，作为民族食品畀咁多人接受，系鹰金钱嘅字号。

一个牌子能够坚承百年，并唔容易，所幸嘅系，鹰金钱唔单止保证质量，仲有种难能可贵嘅文化担当。佢坚守呢种味道，陪伴广州人，过每一个五味杂陈，活色生香嘅小日子。

[街坊话事]认住呢只鹰

@叮叮叮粥：阿爸退休前系个铁路工人，要轮夜班嘅晚上，佢话肚饿渌个即食面加啲豆豉鲮鱼认真和味。所以同亲阿爸去百货公司食品部都会执多几罐鹰金钱鱼罐头，我哋最爱就系豆豉鲮鱼，用佢嚟送饭送粥超正。时代变迁，而家超市啲鱼罐头牌子琳琅满目，但阿爸始终只买鹰金钱，佢话食惯咗呢只味。

@樱桃小蜜饯：仲系细路嗰时，好恨妈妈买鹰金钱嘅罐头鱼。只要买咗我都会喉到实，日日问几时开嚟食，妈妈每次都要用把刀凿烂个盖我先有得食。爸爸见到买咗豆豉鲮鱼，就会笑妈妈又可以偷懒，因为通常一味两餸，豆豉同啲油撩晒出嚟炒油麦菜，鲮鱼肉就放喺饭面焗，嗰晚煲饭绝对唔使担心有剩。

@蒜蓉卤肉饭-：第一份工喺广州罐头厂，即系而家嘅鹰金钱集团生产线上班，从女工做到车间主任，眨下眼就做咗卅几年。嗰个年代，去罐头厂做嘢系好多人梦寐以求嘅事，因为工厂发罐头，屋企有餐餸！嗰阵“鹰金钱”罐头鲮鱼红极一时，而家就重犀利，美洲、东南亚、澳洲有得卖啦。

(来源:南方都市报; 采写：南都特约记者冯璐赟;特别鸣谢：广州老字号协会)