宝生园：取次花丛细回顾，为谁辛苦为谁甜

宝生园，创办于1924年，由广东南海县平洲人氏梁少川创立，距今已有89年历史，以品质纯正、洁净嘅蜂蜜产品而闻名。曾改名为“广州蜂蜜店”，1989年恢复原老字号，更名为“宝生园蜂产品总汇”。广州人素有食用蜂蜜嘅习惯，湿热体质嘅粤人，离唔开清热解毒滋润嘅蜂蜜。蜜蜂系人类嘅好朋友，而宝生园呢个蜂蜜老字号，亦系广州人最熟悉嘅老朋友。今次记者采访到广州市宝生园有限公司嘅麦田光总经理顾问，了解宝生园九十年嘅蜜意浓情。

轰动效应中声名日隆

南都：据闻宝生园创始人梁少川系因为业余爱好养蜂先至开始做蜂蜜产品嘅？

麦田光：梁少川系南海县嘅一个老师，佢本身对中医感兴趣，喺中医药典入面，凡系同蜂有关、人能够利用嘅资源，都同中药有联系，各有用处。嗰个年代嘅人，都有啲济世情怀，既然蜂蜜喺各方面对人类保健都有积极作用，而梁老本人又钟意养蜂，所以就放弃教师职业，创造条件，喺1924年办咗第一个养蜂场，取名“宝生园”，意为“宝贵生命之园”，喺呢个角度去做一啲对社会大众有益嘅事。

南都：喺广州开第一间蜂蜜店系几时嘅事？

麦田光：喺南海平洲开咗养蜂产冇几耐，就喺当时广州最繁华嘅商业旺地永汉路(现北京路)240号开咗第一间店，前店后厂，主营自养嘅高品质纯正蜂蜜。呢个店经营时间都有七十几年，一直到2004年，因为城市改造，配合商业步行街嘅打造，先至拆咗。

南都：宝生园嘅名气系几时开始嘅？从何而来？

麦田光：首先宝生园嘅蜂蜜质量非常好，全部系自产自销。其次，梁老本人钻研中医，凭多年嘅中医实践经验结合蜂产理论，独创药食同源嘅理念，又对贫苦大众慈善救助。第三，梁老喺宣传蜂产保健作用上做咗好多努力。1935年，佢喺大南路搞咗个史无前例嘅蜂产品知识展览，参观者上万人，系当年广州嘅一宗大新闻。展会中最有趣嘅系一张“大胡子”照片———梁老善于养蜂，甚至可以讲系同蜜蜂交朋友，有一次佢将一箱蜜蜂引到佢嘅面颈上，蜜蜂唔单止唔针佢，仲密麻麻咁垒成一个奇特嘅“络腮胡”。梁老请照相师傅立此存照，并挂喺店中，呢张相已经成为经典。当年广州城唔大，如此奇事一下轰动全城，宝生园名声日隆。当时嘅广州市第一任市长孙科，为宝生园题写店号“宝生园养蜂场”。

南都：民国时期宝生园嘅鼎盛，同梁少川本人嘅能力同理念系直接关联嘅？

麦田光：嗰阵时嘅蜂产品字号唔多，宝生园最有名。我觉得梁少川嘅经营理念带有嗰个时代经营者社会责任感强嘅特点。同仁堂有幅对联，“炮制虽烦必不敢省人工；品味虽贵必不敢减物力”，我觉得能够概括当时同类企业家嘅特点，就系唔偷工减料，唔取巧欺假，货真价实，一丝不苟，呢个系嗰个时代企业家嘅特质同埋企业精神。

苦涩年代嘅奢华甜蜜

南都：宝生园接近百年嘅历史，有冇咩跌宕？

麦田光：公私合营之后，宝生园被收为国有，改名为“广州蜂蜜店”，好长一段时间，呢个品牌就销声匿迹咗。到1989年先至恢复返老字号，叫“宝生园蜂产品总汇”。其实国家接管后，人员同做法都系同以前宝生园嗰套，只系由于历史政治环境，对于旧社会留落嚟嘅嘢，就将佢淡化。呢段时期，就系宝生园嘅沉寂期。

南都：“广州蜂蜜店”时期，蜜糖嘅消费点样？蜜糖会唔会变得更矜贵？

麦田光：本来蜜糖就一直都唔系普通消费品。嗰阵时系计划经济，连白糖都要凭证供应，蜜糖直头就系奢侈品，冇可能进入寻常百姓家。以我自己嚟讲，1970年代嘅时候，我廿几岁，做知青喺海南农场返嚟，去北京路广州蜂蜜店度买蜜糖，买唔起纯蜜，只可以用5毫纸买一杯蜜糖水嚟饮。当时嘅工资只有三十几蚊，食一碗面都系5分钱，可想而知，蜜糖系几贵嘅嘢。

南都：1960年代，宝生园发现咗蜂王浆嘅功效，蜂王浆究竟有咩好处？

麦田光：蜂王浆好神奇，究竟系咩物质令佢有奇效，科学家而家都仲研究紧。蜂王浆使用得最多嘅系日本人，以前北京路间蜂产品店，一到两个交易会，好多日本人嚟买蜂王浆，几公斤咁带返日本用。当时中国人好少买，食唔起。蜂王浆300蚊一公斤，而当时人均月收入，可能得几十蚊工资，都买唔到一斤蜂王浆。当时买蜂王浆系一克克咁称口架，好似秤黄金咁，价格甚至比黄金仲要贵。

过去唔代表将来

南都：1980年代，宝生园恢复元气，可以讲系有比较好嘅发展。

麦田光：1989年恢复返老字号，因为整个改革大气候，先至畀宝生园呢个老字号重新焕发青春嘅机会。生产规模有两个阶段嘅变化，1989年后，宝生园唔再系前店后厂，喺三元里建造咗一间独立嘅厂，呢个系第一次升级；第二次就系2011年后，厂房迁往从化，由直属上级广州市供销合作总社斥资8000万，打造咗全国性蜂产业生产示范基地，引进先进嘅设备同检测系统，令产品各项指标达到国内领先水平。经营规模上，自从2004年老店拆咗之后，就变成一种连锁经营嘅模式，千间分店遍布全国，广州嘅直营店都有六十几家。

南都：现代化技术同传统工艺生产有咩唔同？

麦田光：以前传统技艺基本上系凭感官嚟测评嘅，闻气味、睇颜色，但系譬如话农药残留，感官系测唔到佢超唔超标。而家从原料采集、生产过程到最后成品，要经过多次理化测验，保证唔受二次污染。现代化技术带嚟嘅，主要系质量嘅保证。攞返嚟嘅蜜糖，气味点、颜色点，感官测评唔能够替代。但系，感官测评系一种基础，理化测评系一种升级。另外，因为技术发展同交通发达，蜜种唔再系得几个南方品种，而家嘅蜜种有三十几个，亦都系适应消费者不断变化嘅需求。

南都：而家嘅蜂蜜市场竞争越嚟越大，宝生园点样面对？

麦田光：一个，我哋真系好强调搞好我哋嘅质量。市场有消费能力，但最大嘅问题就系信誉。由于假嘢太多，令消费者好警惕，如果要品牌发展，最基础嘅就系要保证产品质量。二个，我哋唔能够守住梁少川以前嘅做法，一定要比佢行得更远，从几种产品发展到三十几仲，仲开发一啲对健康状态针对性强嘅蜜种。三个，必须要重视加快做大规模，因为你冇一定嘅规模，好难喺而家嘅市场竞争环境下生存。我哋系行业龙头，你要保持呢个位置就必须要做大规模。

南都：假冒伪劣嘅问题，充斥整个蜂蜜行业，影响行业良性发展。宝生园方面点睇呢种现象，点样自处？点样辨别真假蜂蜜？

麦田光：行业咁样造假法，对经营肯定有负面影响。但系我宁愿乐观啲，如果市场上面好多人都造假，我坚持真嘅话，呢个就系我哋发展嘅好契机。关键就系我哋自己要坚持做好嘅蜂蜜，发展自己嘅品牌。辨别真假蜂蜜，原则上嚟讲，最好认准品牌，选择有食品安全认证嘅产品，购买嘅时候要留意蜂蜜颜色嘅光泽。市面上有啲用转化糖嚟假冒嘅蜂蜜，转化糖嘅原料成本好低，香气肯定唔似纯正蜜糖，亦都唔容易畀人体吸收。仲有一个认识误区，有啲人觉得同一个牌子唔同批次味道唔同，以为系假，但系蜂蜜系农副产品，天成嘅嘢始终有差别。另外，标榜原生态嘅蜂蜜，由于而家生态环境恶化，好多有毒植物，蜜蜂采返嚟直接食用嘅话可能会危害健康，呢样都要警惕。总之，尽量选择信誉度高嘅品牌，同埋唔好太贪平。

南都：宝生园从梁少川时代到如今，呢个老字号嘅价值同埋核心竞争力喺边度？

麦田光：从梁少川到而家，宝生园贡献畀社会最大嘅价值，就系能够同大家一齐建立一个健康幸福嘅家园，呢个系宝生园最核心嘅价值。做好宝生园呢个老字号，挑战好大，九十几年嘅坚持，唔能够放弃，要对得起消费者。能够流传咁长时间，老字号肯定系有自己嘅优势。但系老，只能够代表你嘅过去，唔能够代表你嘅将来。所以我哋要做嘅事好多，包括保证品质，加快新产品开发嘅步子，适应越嚟越高要求嘅市场诉求。如果唔系，呢个字，就只有历史，冇将来口架啦。

记者手记:蜜蜜饮，丝丝润

关于宝生园，我谂起细个时候自己嘅一句童语———“蜜蜜饮”。而家有时候捱更抵夜，妈子冲蜜糖畀我饮，仲会咁样问我：“阿女，要唔要蜜蜜饮啊？”蜜糖一入喉咙，成个人都觉得好滋润，即时条气顺晒。蜜蜜饮，呢个细路哥时候讲嘅词语，亲昵、甜蜜、滋润，净系喺嘴里面讲出嚟嘅声音同感觉，就已经好舒服。蜜蜂、蜂蜜，真系人类嘅好朋友。

知道有蜜糖呢样嘢开始，就系我认识宝生园之初。对于好多广州人嚟讲，蜜糖同宝生园系同义词，要食蜜糖，直接反应只会谂到宝生园。呢个就系广州唯一蜂蜜老字号嘅魅力，亦系广州人无意识嘅集体印象。

麦田光先生讲起宝生园嘅初创，认为梁少川老先生嘅经营理念，影响咗宝生园呢个老字号嘅内涵同精神。梁少川创立宝生园，系因为钟意养蜂，知道蜜蜂系可以化物为宝嘅神奇物种，时值当时中国人身体同精神都处于孱弱状态，为咗将蜂蜜呢种对健康有益处嘅农副食品带畀国人，将蜂产品知识传递畀更多人知道，广州有咗宝生园。

即使因为时代嘅社会环境限制，宝生园品牌曾被淡化，有过一段颇长时间嘅沉寂期，但并未停止过蜂蜜产品同功效嘅探索脚步。恢复原字号之后，宝生园迎嚟一个小高潮。北京路嗰间“宝生园蜂产品总汇”嘅老铺，喺2000年嘅时候，仲曾经引发排队买蜂蜜嘅风潮，生意兴旺。后来，宝生园建造现代化厂房，有过硬嘅技术同设备，质量更有保证；老店拆咗之后，全市独此一家嘅时代结束，虽然唔再有排队买蜜嘅情形，但系一个时代嘅结束，系另一个时代嘅开始，宝生园从此打开连锁经营之路，深入广州每一个角落，唔使排队，滴滴滋润就喺你左近，近在心头。

问到九十载宝生园，面对市场竞争、假冒伪劣嘅行业现象，点样自处嘅时候，麦先生始终保持乐观。佢认为，虽然要发展老字号，挑战好大，竞争环境恶劣，但只要坚持做好嘅蜂蜜，对得起消费者，自然就能够独占鳌头。

宝生园嘅牌子，唔单止系一个商号，佢仲代表咗一种精神，就系呢种坚持纯正，畀人带嚟健康嘅精神，令宝生园始终有生机。亦都因为咁，宝生园先至可以一直陪伴喺广州人身边，用丝丝嘅甜蜜，滋润广州人嘅身心。

[街坊话事]　往事甜蜜蜜

@ know ingyou知多少：因为我底子燥热，所以屋企人经常会买蜜糖畀我饮。提起买咩牌子好，阿爸肯定话，宝生园，因为牌子老，而且系广州本地出产嘅，品质有保证。我仲记得细细个成日乘阿爸阿妈唔注意偷蜜糖食，以前嘅包装好似蜂巢造型咁嘅玻璃樽。有次滴到四围都系蜜糖，引嚟好多蚂蚁。阿爸闹我，应该系话啲蜜糖咁贵，你分畀蚂蚁食搞边科？

@ MA开心一族：宝生园系我由细到大嘅蜜糖埕，嗰时阿妈买樽系看门口嘅。边个喉痛声沙饮啖顺晒。买樽返嚟往往会被几姊妹偷饮食，分斟唔匀会争泻晒。又饼干夹蜜糖，脆甜到唔怕被阿妈籐条焖猪肉。仲有，一次路边喷农药，我吸入中毒呕吐，靠饮宝生园食白粥搞掂。睇过蜂农大缸入细樽灌蜜糖，佢话糖滴落纸巾，唔化水坚嘢！化水流嘢！

@肥仔阿权：以前就在电视机里看到香港电视剧里有人在说柠蜜，以前我不知道是什么来的，我就听说过冬蜜，龙眼蜜……我记得我还让妈妈带我去买，人家问我要买什么，我大声说我要宝生园的柠蜜，后来被人家笑话了一翻后才知道原来柠蜜是柠檬汁加蜂蜜，后来自己弄了来喝非常好喝的，现在也一直有冲柠蜜喝的呢。

@荷花猪猪：谂起细细个时，舅父仔刚出来工作，佢攞到工资就给我妈妈买了两瓶宝生园蜂蜜，我记得一瓶是百花蜜，一瓶是冬蜜。妈妈话平常多喝点蜂蜜就能少喝点苦茶，蜂蜜系清热润肺嘅。以前我哋喺秋冬天时冇咁多护肤品涂，都会用一点来涂在脸上来滋润皮肤。其实使用天然嘅嘢仲系好啲，唔会有太多添加剂。

(来源:南方都市报; 采写：南都特约记者冯璐赟;特别鸣谢：广州老字号协会)